საქართველოსა და კანადის მორაგბეთა ეროვნულმა ნაკრებებმა 20 ნოემბერს გამართული საერთაშორისო ამხანაგური მატჩის შემდეგ, ტრადიციული "მესამე ტაიმი" რესტორან "მონოპოლში" აღნიშნეს. საზეიმო ღონისძიებას 19-წლამდელ მორაგბეთა ნაკრების წევრებიც ესწრებოდნენ, რომლებიც სპორტისა და ახალგაზრდობის საქმეთა სამინისტროს მადლობის სიგელებით დაჯილდოვდნენ.

საღამო მუსიკალურად რაგბის კავშირის ახალმა პარტნიორმა - თბილისის ბიგ ბენდმა და ქართული ესტრადის ვარსკვლავებმა გააფორმეს. მორაგბეებთან ერთად, "მესამე ტაიმს" სპორტისა და ახალგაზრდობის საქმეთა მინისტრი - ლადო ვარძელაშვილიც დაესწრო.

საქართველოს მორაგბეთა ნაკრებმა 20 ნოემბერს "ეროვნულ" სტადიონზე გამართულ ტესტ-მატჩში კანადის ეროვნული გუნდი 22:15 დაამარცხა. მომდევნო შეხვედრას ქართველი "ბორჯღალოსნები" 27 ნოემბერს თბილისში ამერიკის შეერთებული შტატების ნაკრებთან გამართავენ.

სპორტისა და ახალგაზრდულ საქმეთა

სამინისტროს პრესსამსახური